【儲飛行里數懶人包】應該申請邊張信用卡

這個時代,社交媒體滲入每個年齡層,每個人都在網上顯露自己的財富和品味,每天不是見到朋友A上高級餐廳,就是朋友B到了外地旅行。瀏一下IG,好像所有人都過著奢華生活,加上網上和電視廣告不斷發出訊息叫人「及時行樂」,用借貸或分期付款的方式去過一個自己負擔不起的生活,令人不自覺地過度消費,而信用卡就是最簡便的借貸方法。

但留意,信用卡的所謂信用額,是超高利息的,一但進入了「借貸渡日」的模式,就會變得萬劫不復。所以我認為使用信用卡的最佳方法,就是不論有幾多日還款期,都在收到賬單的第一天全數還款,否則被收利息或逾期罰款,就無論有多少優惠都補賞不了。

---我是分隔線---

說教完畢,以下我將會列出2018年「三張卡儲(Asia Miles)里數」嘅心水組合,但首先要解釋一下,每張信用卡嘅優惠條款都唔同,所以唔同情況下會用唔同信用卡,例如食飯用A卡,去超級市場就用B卡,找手機月費就用C卡,八達通增值用D卡,諸如此類。(想直接睇答案就跳到最尾TL;DR)

第一張:必備之選-建行eye信用卡

呢張卡用途係「嘟卡」同埋「網購」。先講嘟卡,無論係Visa Paywave定係Apple Pay,都有5倍積分($3/里),即係去超市、七仔、任何收Paywave或Apple Pay嘅都啱用。第二個用途係網購,都係5倍積分,我搭Uber、去HKTVmall同Ztore買嘢,都係用佢。(留意嘅係,海外簽賬的話Visa係收多1.95%,所以海外簽賬我會用冇呢個收費嘅銀聯卡)

另外建行有個叫做「賞即飛天地」嘅計劃,免費申請嘅。加入咗之後去旅行社或航空公司訂酒店機票有額外3倍積分,即係去國泰網訂機票,嗰張機票係會有8倍積分($1.875/里),所以網購嚟講呢張卡真係冇得輸,一定要申請。

第二張:食飯/八達通之選-渣打Asia Miles信用卡

鄭經理賣廣告賣到街知巷聞嘅呢張卡,如果只可以 持有一張信用卡,淨係用呢張就夠,乜都唔需要再諗㗎喇。佢無論食飯、網購、同海外簽賬,都係$4/里,所以網購佢係唔夠eye信用卡咁抵,但係佢食飯就贏晒,市面上除咗匯豐嘅Visa Signature之外(稍後介紹),就冇其他卡及得上佢,再加上佢八達通自動增值有$6/里,仲要自動入Miles落戶後,唔使俾手續費,肯定係全港最強,講完。

(2018年5月31日前用呢條referral link,申請人可以額外多2,000里:https://www.sc.com/hk/zh/promotions/asiamiles-mastercard-credit-card-referee-offer/?cid=fb-reg-form&sno=HKR1345-8134

第三張:其他消費-東亞Flyer World Mastercard

呢張卡最特別嘅地方係,一般消費全部$5/里,乜都唔使諗,所以唔係網購唔係食飯唔係超市嘅嘢.例如去電器舖、玩具舖、飛髮舖、去酒店食自助餐(酒店消費喺信用卡嚟講唔當係餐飲類),總之唔落入有特別優惠嘅類別,$5/里呢個rate都係贏晒。所以好多人訂酒席都會用呢張卡,碌三十萬就夠換一程來回歐洲機票。不過佢年費要成$1,800,每年簽夠$90,000先waive到,如果waive唔到就唔抵用喇。(順帶一提,呢張卡之前網上繳款,即係交水電煤等等係有分儲,但係而家已經取消咗,冇分儲喇)

第四張:高薪之選-匯豐Visa Signature信用卡

如果你年薪夠48萬,咁呢張卡就啱你喇。匯豐卡係麻煩少少,因為佢唔係就咁用分換里數,而係用分換「獎賞錢」再換里數(一個「獎賞錢」=10里),而佢個「獎賞錢」計劃係可以將啲分放入唔同嘅類別嘅,但係我建議放晒啲分落去食飯就一定啱㗎喇。

一般普通匯豐白金卡,放晒啲分去食飯,就會有「6X獎賞錢」,計埋即係$4.167/里,換里數仲要收手續費,所以用渣打好過。

申請資格要年薪48萬嘅匯豐Visa Signature卡,就會額外會多3X,即係夾埋有9X「獎賞錢」,亦即係$2.78/里。呢個rate就真係贏其他卡成條街,有咗佢就連渣打都唔需要用喇,而且HSBC仲成日有ad-hoc嘅優惠,簽夠數又有額外獎賞錢,所以申請到就攞張旁身啦,本身有匯豐戶口又或者係長期客戶嘅話,未夠年薪都有機會申請到嘅。

TL;DR

最後總結就係:

  • 如果只想持有一張信用卡-渣打Asia Miles Master信用卡
  • 如果想持有兩張信用卡,而年薪未達48萬-渣打Asia Miles Master信用卡+建行eye Visa信用卡
  • 如果想持有兩張信用卡,而年薪到達48萬-匯豐Visa Signature卡+建行eye Visa信用卡
  • 如果想持有三張信用卡,就再申請埋東亞Flyer World Mastercard

Photo Credit: Wikipedia

Author: Keith Li Keith Li(李勁華)為流動應用程式開發商Innopage創辦人及CEO、浸會大學客席講師、香港無線科技商會執行委員,並於2016年選舉委員會(資訊科技界界別分組)選舉中勝出,當選選舉委員會委員。Keith曾於蘋果日報撰寫IT創業專欄〈偉大航道〉,現時定期在〈信報StartupBeat〉、〈立場新聞〉、〈評台〉等多個媒體發表文章。